مواد شديدة السمية في الاطفال

[طبيبة اطفال]

بسم الله الرحمن الرحيم
السلام عليكم ورحمة الله وبركاته
اللهم صل وسلم وبارك على نبينا محمد وعلى اله وصحبه أجمعين...


هذا المقال عن المواد الشديدة السمية للأطفال والتى قد
تؤدى إلى الوفاة بجرعات قليلة وهي مشهورة فى الأطفال ب ONE PILL CAN KILL بمعنى إن قرص واحد قد يكون قاتل لطفل وزنه 10 كيلو ( عافانا الله واياكم وذريتنا وسائر المسلمين) :

1- أدوية الضغط زى الكونكور و الإنديرال و السبب انهم بينزلوا الضغط و ضربات القلب و السكر بالدم والإييبيلات و الأيسوبتين والسبب انهم بيسببوا هبوط حاد فى الضغط والدورة الدموية .
.
2- أدوية السكر زى الأماريل و الديامايكرون وهى علاج مرض السكر من النوع التانى تسبب هبوط فى نسبة السكر بالدم و غيبوبة و تشنجات وخطورة هذه الأدوية انها تسبب انخفاض السكر و ممكن يحدث متأخر فى أول 24 ساعة لذلك الطفل لازم يتحجز حتى لو مفيش أعراض و سكره كويس فى البداية لمتابعة السكر كل ساعة إلى ساعتين .
.
3- الأدوية المضادة للاكتئاب Tricyclic antidepressant زى الأنافرانيل و التوفرانيل والتريبتيزول ودى طبعا بتستخدم لعلاج الاكتئاب لكن لها استخدامات تانية فممكن تكون موجودة فى البيت و منعرفش فبتستخدم فى علاج بعض حالات التبول اللارإدى فى الأطفال و لعلاج سرعة القذف و الصداع النصفى والتسمم بهذه الأدوية فى الأطفال ممكن يسبب إختلال فى ضربات القلب و غيبوبة و تشنجات و هبوط فى الضغط .
.
4- الأدوية المضادة للذهان اللى بتستخدم لعلاج أمراض نفسية زى الفصام .
.
5- الأدوية المضادة للملاريا زى الكلوروكين و لها إستخدامات اخرى فى علاج بعض أمراض المناعة الذاتية زى الذئبة الحمراء و الروماتويد .
.
6- الأدوية المخدرة زى المورفين و الترامادول وحدث و لا حرج عن الترامادول و انتشاره حاليا وشفنا حالات أطفال كتيرة واخدة ترامادول وبتبقى المشكلة إنكار الأهل عشان المسؤولية وطبعا الترامادول ممكن يعمل غيبوبة و فشل كلوى و توقف بالتنفس .
.
7- ومن الأعشاب ما قتل مادة الكامفور Camphor ودى مادة عشبية بتستخدم فى الكريمات المسكنة للألم زى آلام الظهر و العضلات و طبعا مشهورة جدا و موجودة فى كل البيوت كريم زى الجازون أو مووف مساج وهو ممكن بكميات بسيطة يسبب ترجيع و اسهال و غيبوبة و تشنجات .
.
8- المبيدات الحشرية بتختلف درجة السمية على حسب النوع و الكمية و طريقة التعرض لكن فى بعض الأنواع شديدة السمية بكميات بسيطة وممكن تؤدى إلى الوفاة .
.
9- مادة البنزوكين Benzocaine و هى مادة مخدرة بتستخدم فى جيل تخفيف آلام الأسنان زى الدنتوكالم و الدنتوكين الشهيرين لتخفيف آلام ظهور الأسنان عند الأطفال ممكن تسبب حالة نادرة اسمها Methemoglobinemia خاصة عند الأطفال أقل من سنة و المصابين بأنيميا الفول و أعراضها زرقة ونقص بأكسجين الدم و صعوبة بالتنفس و تشنجات ودمهم بيقى غامق زى الشيكولاتة .ولذلك مؤخرا وقف استخدام او بيع او تداول هذه الانواع من الجيل لخطورتها...
.
10- أخيرا فى حاجتين ممكن يكونوا موجودين فى أى بيت و فى متناول الأطفال و على درجة عالية من الخطورة :
.
أولا صبغة الشعر لان بها مادة قاتلة تسبب تورم فى اللسان و الحنجرة و ضيق فى مجرى التنفس و فشل كلوى حاد و تشنجات ومشهورة فى بعض الأماكن .

ثانيا بطارية الليثيوم و هي موجودة فى بعض الأجهزة و ألعاب الأطفال و سهل الطفل يطلعها و يبلعها و دى خطيرة جدا لأنها ممكن فى خلال ساعتين تسبب حرق و ثقب فى بطانة المرىء حيث تصنع دائرة كهربائية فى وجود اللعاب وتبدأ البطارية عملها على نحو يصدر منها مادة قلوية تتسبب في تكوين صودا كاوية تؤدى إلى حدوث تآكل في جدار المرىء وحدوث ثقب والتهاب حاد بالصدر و تسرب للهواء حول الرئة وإذا واجهت البطارية طريقا مختلفا، حينئذ يمكنها أن تحدث حرقا في الأورطى والأوعية الدموية الرئيسية .
التصرف فى حالة بلع الطفل لبطارية ليثيوم التوجه للمستشفى مباشرة لعمل أشعة و فى حالة وجودها فى المرىء لازم تتشال فورا بالمنظار من غير تاخير .
.
الاحتياطات: الادوية بشكل عام لابد ان تخزن في مكان بعيد وامن عن متناول الاطفال والاهتمام بهذا الامر..
ولو لا قدر الله حصل شك بالامر ان طفل قد تناول احد من هذه الادوية يرجي التوجه فورا لاقراب مستشفي او مركز سموم....

عافانا الله واياكم واولادنا جميعا والمسلمين من كل سوء..