لما تلاقيها ضلمت أوي..وتلاقي نفسك مش قادر

[بشارة]

بسم الله الرحمن الرحيم
السلام عليكم ورحمة الله وبركاته
وصل اللهم على نبينا محمد واله وصحبه الكرام وسلم تسليما كثيرا

​

و لما تلاقيها ضلمت اوي و تلاقي نفسك خلاص مش قادر.. الهموم حواليك و حاسس ان مفيش فايدة و مفيش امل و مفيش حاجة بتتغير..

افتكر ان ربنا يري و يعلم إنك بتتألم و مستني منك ترفع ايدك و تدعيله و تلح عليه في الدعاءو تبكي بين ايديه و تقوله يارب انا خلاص مش قادر..

تشكيله همومك و تحسن الظن بيه و تطلب منه كل اللي بتتمناه..

افتكر انه بيقولك (انا عند ظن عبدي بي فليظن عبدي ما شاء)
افتكر ان ربنا ارحم بيك من رحمة أمك.. اه والله.. دة كلام رسولك الحبيب عليه الصلاة والسلام.. أليس هو القائل (الله ارحم بعباده من الوالدة بولدها)؟

مش مكسوف من نفسك لما تبقي عبد غافل مليان ذنوب و غفلة و انشغال بالدنيا و بعد عن الله و تبقي عارف ان المولي جل جلاله ينزل الي السماء الدنيا كل ليلة و هو. من هو؟ وانت من انت؟! العظيم الكريم مالك الملك يقول : من يدعوني فاستجيب له؟ من يسألني فأعطيه؟ من يستغفرني فأغفر له؟ )

وانت عارف كدة كويس ورغم كدة مبتفكرش تقف اللحظات الغالية دي بين ايديه؟؟؟


كلمه و اشكيله و ابكي بين ايديه زي الطفل الصغير و استشعر عظمته و قدرته علي تبديل الاحوال و تفريج الهموم.. أليس هو القائل ( وإذا قضي أمرا فإنما يقول له كن فيكون) ؟؟

احنا مؤمنين بالكلام دة بجد و لا بنردده و مفيش يقين حقيقي؟؟


زهقت و غصب عنك بتحس انك بتدعي كتير و مفيش حاجة بتتغير؟
افتكر حديث الرسول عليه الصلاة والسلام : ( يستجاب لاحدكم ما لم يعجل يقول قد دعوت فلم يستجب لي).


افتكر وعد ربنا سبحانه و تعالي ( وإذا سألك عبادي عني فإني قريب أجيب دعوة الداع إذا دعان)

لعل و عسي ان ربنا يطلع علي قلبك فيري فيه الصدق و يقين و الاخلاص في الدعاء فيستجيب دعاءك و يفرج همك و لعلك تكون سبب في رفع البلاء عن الامة أجمع... و ماذلك علي الله بعزيز..


(و لا تيئسوا من روح الله إنه لا ييئس من روح الله إلا القوم الكافرون).

(ورحمتي وسعت كل شئ فسأكتبها للذين يتقون و يؤتون الزكاة و الذين هم بآياتنا يؤمنون).