إلا صلاتك

[أسماء زهرة]

بسم الله الرحمن الرحيم
السلام عليكم ورحمة الله وبركاته

(إعادة نشر بعد تعديلات نافعة وهامة إن شاء الله ليكون مناسبا للصغار والكبار أيضا)

إنت بتصلي؟
حاسس بالصلاة؟
فرحان بيها؟
لامس نتيجتها في حياتك؟
لو أي سؤال من دول إجابته "لأ"، يبقي اقرأ معايا كدة وراجع نفسك..

إنت عارف يعني إيه "يلا نصلي"؟
يعني يلا نكلم ربنا....*1
يعني يلا بقا نفصل شوية من طاحونة الدنيا ونرتاح بين إيدين ربنا، وننور حياتنا بنور ما بيقطعش!..
هتقول لي " وإزاي بقا صلاتي تنور حياتي!؟ دة هما يادوب خمس دقايق ف خمس مرات في اليوم!!"....
تعالى نجرب نصلي سوا دلوقتي.. واحكم بنفسك..

ابدأ الأول بإنك تنزل ذنوبك في الحوض بالمية عشان تبقى "أبيض" قبل ما تقف قدام ملك الملوك.. #لقاء_رفيع_المستوى.. اتمضمض كويس وتف الكذب والغيبة والنميمة... اغسل عينك كويس من النظرة الحرام وادعك ايدك ورجلك ووشك تماااام ونزل الذنوب.. #انضف_وتطهر_للقاء_الملك...
إنت عارف إن زماااااان الواحد من السلف بعد ما كان يتوضا كان بيترعش وهو داخل على الصلاة، فيسألوه مالك بتترعش كدة ليه؟!! يرد يقول: "إنتوا مش عارفين أنا هقف بين إيدين مين دلوقتي؟!"...

خلصت وضوء خلاص؟ وثبِّت على دراعك ورجلك ووشك النور إللي هييجوا منورين بيه يوم القيامة إن شاء الله؟ تمام جدا...
خد بالك بقا وركز جدا في اللي جاي..

إنت عارف إنت داخل فين دلوقتي؟ انت داخل دلوقتي في منطقة حرام..
يعني حرم ممنوع فيه أكل وشرب وضحك وأي كلام إلا الذكر.. هتقف بين إيدين ربك إللي خلقك في الدنيا دي.. مجرد ما تقول: "الله أكبر" وتزؤ الهوا بإيدك ورا ودانك تخيل نفسك بترمي الدنيا كوووولها بضهر ايدك ورا ضهرك.. #كووول_الدنيا

طب عارف يعني إيه الله أكبر؟ يعني مفيش أقوى منه ولا أرحم منه ولا ألطف ولا أعظم ولا أوسع ولا أجود ولا أقدس ولا أعز ولا أعلم ولا أحكم ولا أعدل ولا أعلى منه، ولا أشد منه جبروتًا وانتقامًا وبطشًا وقهرًا ونفعًا، كوووول شيء هو سبحانه الأكبر فيه، كل شيء من إللي ربنا أثبته لذاته في القرآن والأحاديث الصحيحة.

قبل ما تبدأ صلاة، اطفي أي دوشة وابعد عن أي ملهيات .. انت محتاج تستحضر قلبك.. يعني تندهله وتهقول له "احضر هنا تعالى قدامي"، وتخليه يركز جدا... لازم تهيأ نفسك يا مسلم للقاء الجبار الرحيم العظيم الحليم.. الكرييييم..

اختار مكان في البيت بتحس فيه بسكينة وهدوء وانقطاع من الدنيا نوعا ما -لحد ما تتجدعن كدة وتروح المسجد بقا مع #الرجال..
وقبل الصلاة اختار السُّوَر أو الآيات إللي محتاج تمررها على قلبك عشان ترققه وتجدد إيمانه ونوره.. اكيد كل ما مررت على قلبك كل يوم آيات جديدة اكيد هتفرق في حياتك.. بلاش تفضل ماسك بس في سورة الكوثر او قريش، و هاجر باقي القرآن في صلاتك.. انت محتاج تغسل قلبك بالقرآن كله... #خذ_بأسباب_الخشوع....

قبل ما تصلي كمان مهم جدا تقف قدام المراية وتظبط لبسك كدة وتشمه وتتأكد من نضافته وتحط عطر جميل❤*3، هاتقول لي هو انا رايح انترفيو والا داخل على مديري ! هاقول لك بل أشد! انت داخل للقاء الملك..! #خذوا_زينتكم_عند_كل_مسجد..

وياريت فـ إيدك السواك بتاعك اكيد، إوعى تهجر سنة حبيبك صلى الله عليه وسلم إللي فضل متمسك بيها طول حياته ولحد سكرات الموت عشان ينبهك ويوصيك أد إيه مهمة وبيحبك تعملها.. #طيب_أنفاسك_للقاء_الملك_و_ترتيل_كلامه

طب إنت عارف إنك لو نضفت سنانك بالسواك وقمت تصلي، المَلَك بيقوم معاك يقف وراك يسمع لقراءتك، ويقرب منك لحد ما ياخد كل القرآن إللي خارج من بؤك على جوفه مباشرة! طهر فمك بقى للقرآن بما يليق بمقام الملائكة.. ❤*10

كل دة بنستعد للصلاة؟! هاعمل كل دة 5 مرات في اليووووم ... ! طبعًاااا.. شوف كام مرة في اليوم بتعمل كدة وانت بتلف عالمكاتب تدور على شغل..! لازم تستوعب ان دي أهم مقابلة فـ يومك وليلك...

خش في الصلاة بقا و ساوي الصف مع إللي جنبك زي ما الملايكة بتعمل تماااام.. واقفل الفتحات إللي بينكم كويس عشان الشياطين ماتعرفش تدخل توسوس وتسرق حاجة من صلاتك*4، ولما تبدأ فـ الصلاة ركز نظرك على مكان السجود و بص لتحت في إشفاق وانكسار يا #عبد يا #مسكين، و ركز إنك ما تتلفتش يمين وشمال عشان ربنا ما ينصرفش عنك*2، وابقى تخيل نفسك قدام الكعبة مباشرة قبلة المسلمين وإن فيه ملايين زيك واقفين الآن متجهين معاك لنفس الكعبة في كل انحاء الكورة الارضية بصلاة تناسب توقيتهم، واستشعر مدى عظمة ان ربنا ناظر إليك و إلى صلاتك الآن.. وتخيل ان الجنة على يمينك.. وإنك واقف على الصراط الرفيع أوي دة.. وافتكر كويس إن جهنم تحت الصراط دة.. وملك الموت وراك مستنيك تخلص صلاتك عشان يقبض روحك.. والرسول صلى الله عليه وسلم بيتفرج على صلاتك.. تخيل يا مسلم إنها آخر صلاة ليك.. وافتكر لما تخلصها تفضل قلقان هي اتقبلت ولا لأ أصلا... ! هو المؤمن بحق كدة دايما بين الخوف والرجاء.. *13

ابدأ استعيذ و بسمل للفاتحة وافتكر كويس إن أي شيء هتبقى قلقان عليه وإنت في الصلاة أو شايل همه هو أصلا بإيدين ربك إللي إنت بتصلي بين إيديه، عشان كدة اتوكل عليه سبحانه و #اخشع... وفضي قلبك تماااامًا من أي هم ولو بسيط: "يعني مثلا البرنامج إللي إنت خايف يفوتك فعاوز تصلي بسرررعة عشان تلحقه----ربنا هو إللي دلَّك عليه ويسَّر لك متابعته أصلا.. إنت ممكن تكروت الصلاة بسرعة عشان تلحقه ثم تلاقي النور قطع!.. طب التليفون إللي خايف يسكت وما تلحقش ترد على صاحبك!---ربنا هو إللي خلاه يرن.. إنت ممكن تكروت الصلاة بسرعة وبرضو تيجي ترد تلاقيه قفل!... #بتحصل... السلعة إللي انت خايف إن المحل يقفل أو حد يسبقك ويشتريها قبلك---ربنا هو إللي هيحفظها لك لو هي رزقك".. كوووول دة ==== #رزق_بيد_من_تقف_بين_يديه.. ربنا قال عن الصلاة: "وَاصْطَبِرْ عَلَيْهَا لَا نَسْأَلُكَ رِزْقًا نَّحْنُ نَرْزُقُكَ"

طب عارف إن ربنا يسر لك الصلاة نفسها جدا؟ ربنا سبحانه عمل لك رخص عشان الصلاة عمرها ما تبقى تقيلة على قلبك ولا على بدنك #يعلم_من_خلق.. #لطيف #خبير... ❤❤.. وكانت خمسين صلاة مفروضة عليك كل يوم لكن خففهالك وخلاها خمسة بس.. مش بس كدة، دة سبحانه بيحب إنك تؤتي رخصه في الصلاة وتستمتع برحمته:
عندك الصلاة في النعل مثلاً----مش في الشارع بس!.. عندك المسح على الجورب مثلاً---مش في البرد بس! أبدًا والله.. اتعلم إنت بس شروطهم وموانعهم وتابع نفسك لحد ما تتعود على خمس مسحات فقط في غير السفر، مش 47 مسحة يا مؤمن #اتق_الله..
عندك لو عاجز عن الوقوف او تعبان بدرجة تحرمك من الخشوع---اقعد وارتاح عشان تركز وتخشع..
عاجز عن الصلاة قاعدا----صل نائما...
عاجز عن الوضوء---اتيمم.. بضربتين على التراب و مسح لوجهك ورداعك ف ثانية بقيت طاهر... #مالكش_حجة_ولا_عذر

ولو الجو تلج ما تتوضا بالمية الدافية وكفاية كسل!.. مفيش مانع تتنعم برحمة الله ابدا.. -بس بلاش تتعود على كدة على طول عشان النبي صلى الله عليه وسلم وصانا بالخشونة عشان النعيم والنعمة مش بيدوموا، النبي صلى الله عليه وسلم عاوزك تبقى مجاهد قوي صلب ثابت تتحمل كل حاجة وكل الظروف.. #مش_طري_و_نيّ_كدة_و_واخد_على_النعيم

حط إيدك الشمال على موضع قلبك كدة في منتصف صدرك، و حط عليها ايدك اليمين... و حس كإنك بتسكن قلبك بكفك كدة عشان يركز في الصلاة وتبدأ.. وحطة ايدك كدة بتواضع وانكسار دي وقفة الأدب قدام ملك العالمين سبحانه.. #تأدب عشان #الله_أكبر... وحذاري تفرك كتير في الصلاة.. #اخشع_واسكن_فأنت_في_حضرة_خالقك...
عارف سيدنا عمر قال ايه عن اللي بيفرك كتير في الصلاة؟ قال عنه: "لو خشع قلبه لخشعت جوارحه" #حقيقة..

بدأت الصلاة خلاص آهو أخيرا؟ الحمممممد لله رب العالمين... سبحان من جعلها أول آية في الصلاة بعد البسملة ❤..
آه والله الحممممد لله رب العالمين فعلا... قولها بقلب بيبكي فرحا ببداية اللقاء الجليل ❤
الصلاة فعلا نعمة بجد تستحق الحمد بقلب مذهول من السعادة أن مكنك خالقك من الوقوف بين يديه والاتصال به عز وجل وهو رب العالمين الغني عنك اصلا❤..

طب عارف قصة الفاتحة؟ وإنها مقسومة نصين بينك وبين ربك؟ وإن ربنا عز وجل بيرد على كل آية؟ جربت تركز في الفاتحة وإنت بتقراها بالمعنى دة وتتخيل الحوار الجميل أوي دة؟! تقول الحمد لله رب العالمين، ربنا يرد عليك "حمدني عبدي". تقول الرحمن الرحيم، ربنا يرد عليك "أثنى عليّ عبدي". تقول مالك يوم الدين، ربنا يرد عليك "فوّض إليّ عبدي". وتكمل لحد آخر السورة وربنا يرد عليك برضو "هذا بيني وبين عبدي ولعبدي ما سأل"، جربت دة قبل كدة يا من تبحث عن السعادة؟...
هو فيه إيه في الدنيا يا مسلم أحلى من كدة*6..

طب عارف معنى المغضوب عليهم ولا الضالين؟ وهل بتستشعر فعلا نعمة العافية من اتباع صراط الفريقين دول لما بتقول آمين؟ والله العظيم لو عرفت معنى الفاتحة كلها هتعرف إن كل الدين جواها إجمالا.. وهتحبها أوي❤.. وهتفرح بصلاتك❤.. وهتستنى الفاتحة في كل ركعة عشان ترجع تاني ترتلها وتعيش مع أسرارها اللي ما بتخلصش.. وهتتغير حياتك ساعتها بجد إن شاء الله..

بس لازم من الاول تبقى واخد بالك كويس اوي من "خنزب"، حرامي الصلاة الخبيييث... و دة مش هاتعرف تطرده إلا بالخشوع.. ركز في لقاءك في معية الله عشان خنزب يرجع مخذول ومفلس ماعوش حاجة مسروقة من صلاتك اللي قعدت تحضرلها كل دة يا مسكين*7
ولو حد عدى قدامك وانت بتصلي إبعده بلطف.. ولو صمم برضو انه يعدي إبعده برضو ما تستسلمش حتى لو اضطريت تزقه جامد من كتر ما هو مصمم يعدي! -ادفعه ما استطعت بس من غير ما تبوظ صلاتك*14.. النبي صلى الله عليه وسلم ادالك الحق دة عشان تعرف تحافظ على حرم صلاتك لأقصى حد... شفت لآني درجة بتهيأ الجو لموعدك مع الجليل العزيز!... الصلاة دي من أهم و آخر الوصايا إللي حبيبك النبي صلى الله عليه وسلم وصّى المسلمين عليها وهو بيموت، في عز ما كان بيتصبب عرقًا من أثر سكرات الموت قعد ينبه المسلمين عليها كتير: "الصلاااااة.. الصلاااااة...".. معقولة تضيعها بالبساطة دي!

اركع واسجد يلا..
و في ركوعك حقق حروف التسبيح والاستغفار ببطء وسكينة وصوت لا عالي ولا واطي، عشان تمررها على قلبك وتغسله.. -همس مسموع لك لا أكثر فلا يزعج من بجانبك : "بَيْنَ ذَلِكَ سَبِيلًا"*8.. وانطق بالراحة محدش بيجري وراك... سبح الملك السبوح القدوس بما يليق بمقامه.. س ب ح ا ا ا ا ا ن ربي الأعلى... انطق بالراحة مرة واتنين وتلاتة واكتر... استحضر زلاتك وعثراتك وأخطاءك وانت بتستغفر..

وفي السجود برضو، حقق حروف التسبيح بالراحة وحس بالسكينة في حركاتك وكلماتك، وطوووووّل في السجود #هو_انت_تطول!.. دة أقرب مكان بتكون فيه من ربك!.. طوّل بقا وادعي بكووول إللي نفسك فيه.. وياريت كل دعاويك تكون أخروية لإنك مسلم مؤمن بالغيب وتحمل هم الآخرة على الدوام ولا تحمل للدنيا هما.. وما تنساش تدعي لنفسك تحفظ القرآن وتفهمه وتعرف تطبقه و تبلغه، -وطوّل في الركوع كمان فوق ما تخطفهوش كدة..

إنت عارف إنك أول ما بتركع أو تسجد، كل ذنوبك الباقية إللي ما نزلتش قبل الصلاة مع ماء الوضوء، بتتحط فوق كتافك، وطول ما إنت راكع وساجد بتفضل الذنوب دي تتساقط عن عاتقك بإذن الله!*11.. اسجد كمان مرة تانية.. اصل سجدة واحدة فعلا مش كفاية أبدا والله*12❤ ..
عشان كدة الصلوات الخمسة كفارات لما بينهن.. -بس لو ما إنت ما عملتش كبائر طبعا بينهن .. اسجد كتير انت محتاج للسجود... #أعني_على_نفسك_بكثرة_السجود

جينا للتشهد بقا.. طب عارف معنى التشهد؟ عارف أهميته عند النبي صلى الله عليه وسلم؟ طب عارف إن النبي علمه لسيدنا عبد الله بن مسعود وهو ماسك كفه بين إيديه الشريفة صلى الله عليه وسلم -يا بختك يا سيدنا عبد الله-❤! ومن شدة تعظيمه للتشهد صلى الله عليه وسلم وهو بيعلمهوله كان كإنه بيعلمه سورة من القرآن مش مجرد كلام عادي -دة الوصف بالظبط اللي جه في الحديث! طب عارف إنك لما تقول "السلام علينا وعلى عباد الله الصالحين" إنك كدة سلمت على كل العباد الصالحين في الأرض... #الله_عالصلاة *5 .. حالة من الصلة والاتصال الروحي مذهلة...!

اطلع تاني اقف وبنفس الطريقة كرر الركعات حسب عددهم... وتمم حركات وهيئات الصلاة كلها.. أتم القيام.. وأتم الركوع.. وأتم الجلوس... أتممممم صلاتك... اطممممن في صلاتك.. زي ما قال حبيبك صلى الله عليه وسلم "حتى تطمئن..."...
اتعلم هيئة الصلاة النبوية بالظبط "صلوا كما رأيتموني أصلي"، اشتري كتيب محقق عن هيئة صلاة النبي، واقرأه وطبق منه كل يوم جزء لحد ما تتقنها زي اسمك... دة علم أهم من علوم كليات ومدارس الدنيا كلها... والا انت نسيت انك مسلم.....؟

خلصت صلاة خلاص بفضل الله ورحمته؟
استشعر عظمة النعمة إللي ربنا مكنك منها وحرم منها ناس تانية.. نعمة الصلة بالله والطمأنينة بذكره والفرار من الدنيا إلى الصلاة.. وابتسم ابتسامة رضا وفرحة كبييييرة وإنت لسة قاعد عالأرض وقول لنفسك: "الله عالراحة والجمال.. قلبي فرحاااان بجد وبيبتسم زيي.. له حق حبيبنا النبي صلى الله عليه وسلم يقول الصلاة دي حب حياته وقرة عينه"..
حتى لو هتتصنع دة شعوريا في الاول، استمر---هتتبرمج بالتكرار لا شعوريا إن شاء الله.. وهتحس فعلاً بحجم النعمة مع المجاهدة والمواظبة..

صمم جدول أسبوعي لنفسك بمواقيت الصلاة بالساعة بالظبط، وحط خمس خانات مثلاً لكل فرض ✔1-النضافة والطهارة، ✔2-الصلاة على وقتها، ✔3-إتمام الحركات، ✔4-عدم الحركة كتير، ✔5-أداء سُننها قبل وأثناء وبعد الصلاة...
لكل فرض بالترتيب... وكل خانة في الخمسة دول تاخد علامة بلون مختلف لما تظبطها في الصلاة دي.. وتعد العلامات آخر الأسبوع بتاعة صلوات كل يوم ، وتشوف أكتر لون متحقق في الجدول وأكتر لون ناقص عندك -ارتباط ذهني بالصورة مهم ليك جدًا-.. وخلي الجدول القديم محطوط جنب الجدول الجديد عشان يبقى عندك حافز للتحسن في الجدول الجديد..
وفكر نفسك دايمًا إن الجدول دة هيبقى فيه واحد زيه في صحيفتك إللي هتمسكها فـ إيدك يوم القيامة.. ربنا يجعلها باليمين و يسجل لك فيها ما يسرك.

في حالة إنك صليت لوحدك مثلاً، ولقيت نفسك لكلكت الصلاة، اقعد مع نفسك وأدبها وقول لروحك: "عارف النبي صلى الله عليه وسلم قال إيه على صلاتك دي بالظبط؟! قال إنها نقر زي نقر الغراب للأرض!.. طب عارف النبي عمل إيه مع إللي صلى زيك كدة؟ خلاه يعيد الصلاة كذا مرة لحد ما صلى عدل!.. يلا يا مؤمن يا عبد يا فقير ارجع فصلِّ فإنك لم تصلِّ"...

طب بتتأخر ساعات عن الصلاة؟ طب ليه تتأخر عن الصلاة بعد الأدان وتسيبها لحد الصلاة إللي بعديها وإيه ف الدنيا يستاهل؟! تقدر تتأخر عن طيارتك او معاد القطر؟! أومال تتأخر على أكتر عمل ربنا بيحبه "الصلاة على وقتها"!!؟.. قوم فورا استغفر واستعيذ من إبليس وصلي..
☝☝وما تقولش لنفسك "هو لسة فاضل وقت اد ايه"؟ ...... لأ طبعا ..... قول لنفسك "شايفة انا متأخر أد إييييه"!!.. لعل ربنا يمسحلك التأخير دة ويكتبك من السابقين المسارعين في طاعته لما تندم وتقوم... #أتبع_السيئة_الحسنة_تمحها

بتسيب صلاة الجماعة ساعات؟ يا خبررر! بقا معقوووول حد عاقل يخيروه إن صلاته تتكتب مرة واحدة والا 27 مرة، يقوم يختار بكامل إرادته إنها تتكتب مرة واحدة! ياااا أفقر خلق الله إلى الله قوم استعيذ واتصل بخالقك و #صلي.. ويا سلام لو تغلب شيطانك وتنزل تصليها جماعة في المسجد بيت أكرم الأكرمين عز وجل، تبقا فزت بأوسع كرم ضيافة شافه بني آدم مهما شاف في دنيا من كرم الضيافة عند حد❤ ..دة رب العالمين اللي بيده خزائن السموات والأرض.. إوعى تفوت ضيافة الرحمن لأحبته في بيته عز و جل، مش هتلاقي أبدًا يا مسلم حد في كرمه سبحانه.. #الكريم .. #ضيوف_الرحمن

أنا مش هضحك عليك وأقولك إن الصلاة جماعة في المسجد فرض قولا واحدا، لأ.. حكم الصلاة في المسجد فيه خلاف معتبر، كلنا عارفين وأكيد إنت كمان عارف.. لكن يا مسلم: المسلم الحق متبع لكل الطاعات الثابتة بغض النظر عن حكمها..
كفاية أوي للمسلم الحقيقي إنه يعرف إن ترك الصلاة في المسجد شيء بيحزن النبي جدًاااا لدرجة إنه صلى الله عليه وسلم كان بيتمنى يجيب حد يقف مكانه في صلاة الجماعة عشان يروح هو على بيوت الرجال إللي بيصلوا بلا عذر في بيوتهم عشان يولع في بيوتهم نار عليهم وهما فيها!!.. #إزاي_قابل_دة_على_نفسك ...
وكفاية أوي للمسلم الحقيقي إنه يعرف إن الناس كلها يوم القيامة خارج ظل عرش الرحمن -يوم تدنو الشمس المسعرة من كل الرؤوس- إلا سبع أصناف من البشر لهم الحماية منها في ظل عرش الرحمن، من ضمنهم رجل قلبه معلق بالمساجد..
✌الكلمتين دول كفاية عند إللي بيحب ربنا بجد..

وأخييييرًا...
إوعى تنزل الحفرة في قبرك وانت مش بتصلي!!..
لازم تعرف إن أول حاجة هتتحاسب عليها لما تموت هي الصلاة.. لو فسدت، يبقى باقي عملك الصالح فسد ودفتر أعمالك الصالحة مش هيتبص فيه أصلاً*9

لازم تعرف إن السنن الرواتب عشانك إنت مش عشان حد تاني، لإن إللي ناقص من صلاتك إنت بينجبر بالسنن بتاعتك إنت و دة من رحمة الرحمن بيك انت.. ومين فينا صلاته كاملة!

لازم تعرف إن الصلاة عمود الخيمة الكبيييرة.. هات ملاية كدة وحط تحتها عصاية واقفة، وشيل العصاية وإنت تشوف إزاي البناء بينهار من غير العمود.. من أقامها فقد أقام الدين.. ومن هدمها فقد هدم الدين.. وكل ما توقع الصلاة افتكر تقول لنفسك: "بتهد الخيمة كلها كدة على دماغك يا مجنون #اعقل و #صلي و #اخشع ...

لازم تعرف إن ديننا خلا الصلاة حل لكل المشاكل:
*عندك حيرةفيه صلاة الاستخارة..
*عندك طلبفيه صلاة الحاجة..
*عندنا كسوف للشمس مرعبفيه صلاة للكسوف..
*عندك صدقات أد كدة لازم تؤدي حقهافيه صلاة الضحى تتصدق بها عن كل مفصل في جسمك يوميًا..
*عندك جفاف في البلد والمية شحيحةفيه صلاة استسقاء لجلب الأمطار برحمة ربنا..
*عندك قلب تعبانفيه صلاة قيام تروق البال وتصفي النفوس وتغسل القلوب..

لازم تحس بالفخر من إن ديننا الدين الوحيد إللي المسلمين فيه بيتصلوا بخالقهم خمس مرات في اليوم، وإللي يزود اتصاله بسنن زيادة أكييييد هو الكسبان.. "وَمَنْ يَبْخَل فَإِنَّمَا يَبْخَلُ عَنّ نَفْسِهِ*وَاللهُ الْغَنِيُّ وَأَنْتُمْ الْفُقَرَاءُ"..
فاسجد.... واقترب....

وصدق من قال: "عجبت لمن يبحث عن السعادة وعنده خمس صلوات في اليوم والليلة"

إلا صلاااااااااتك.........

منقول

 

[ابوعزام اليمني]

جزاك الله خيرا

 

[أسماء زهرة]

جزاك الله خيرا

وعليكم السلام ورحمة الله وبركاته
آمين وإياك